مرحبًا بعد انقطاع 🌼.

حبيت تكون رجعتي بكتابة هذه التدوينة مع بداية الدراسة والدوامات تأخرت شوي لكن لا بأس 👀.

صراحة احترت كيف ابدأ ومن وين لكن نبدأ بالاستعداد النفسي :

- أولًا التفكير بقناعة بأن الدراسة لا مفر منها بما أنك اخترت تدرس فأكيد فيه هدف تطمح له🙇، فنحاول تغيير فكرة الدوام مثلًا نصحى أبكرمن العادة لو بربع ساعة للاستعداد النفسي والمزاجي .

- ثانيًا محاولة تنظيم النوم قبل بداية الدوامات وهذي نقطة مهمة جدًا لأن النوم يأثر بشكل كبير على الانتاجية والمزاج، حتى جسديا السهر والنوم الغير كافي منهك .

- ثالثًا تحديد الأهداف المرغوب تحقيقها خلال الترم/السنة، إذا كان الهدف معروف وواضح يسهل الطريق لتحقيقه .

⚛ الاستعداد الشخصي :

احرصي على اللبس المريح والحذاء المريح خصوصا اذا الدوام طويل فالراحه بتكون أهم شيء عندك .

شنطة الدوام الأفضل تكون وحده مناسب حجدمها لحاجتك اليومية ومريحة .

الحاجات الضرورية اللي تكون بالشنطة، من تجربة واطلاع على أفكار ثانية:

- دفتر جيب لكتابة الملاحظات والأشياء الضرورية والجانبية ( طبعا غير دفتر المحاضرات والكتب ) بحيث هالدفتر يكون موجود بالشنطه ما يطلع ولا ياخذه أحد .

- مقلمة أقلام حبر ورصاص .

- محفظة لبطاقات الهوية والفلوس الكاش .

- شنطة تجميلية صغيرة ( مرطب شفايف، روج، ماسكرا، قلم حواجب ) هذي الشنطة يُفضل تكون جاهزه دائما حتى بأي طلعه تاخذينها.

- شنطة العناية الشخصية ( خيط أسنان، فرشاة اسنان صغيرة، حلاوة نعناع، لصقات جروح، بنادول، مقص أظافر، مسحات طبية، فوط صحية يومية ) بتشكروني على هذي الشنطة لأن مو كثير ممكن يفكر بهالنقطه لكن بتحتاجينهها خصوصا لو الدوام طويل .

- فرشاة شعر صغيرة، ربطات شعر/clips .

- دراي شامبو .

- عطر، بخاخ مزيل عرق .

- كريم يد .

- شنطة قماشية صغيرة للأكسسوارات تكون لأكثر اكسسوارات مناسبة مع أي شيء بحيث لو نسيتي تلبسين عندك احتياط .

- مناديل مبللة ومناديل جيب .

- باور بانك .

صورة توضيحية لشنطتي سابقا

⚛ الحياة الجامعية :

دايم اقولها لكل مستجد استمتع الجامعة جميلة وممتعة لكن عيشوها صح.

مرة فيه شخص قال عن كلام الدكتور بجامعتهم "أنت بداية الترم تملك 100 درجة لكل مادة وخلال الدراسة واجتهادك تحافظ عليها أنا اخذ الدرجات اللي تتنازل عنها" اتوقع هذا الكلام بيغير نظرتك للدرجات وتحافظين عليها.

طيب نجي لأول شيء اختاري الأصدقاء الصح اللي يكونون عون لك ما يأخرونك ولا يوقفون بطريقك وهالشيء بتقدرين عليه إذا تمهلتي بالاختيار لا تستعجلين أبد عشان ما تندمين !

إذا انطلب منكم عمل جماعي باختياركم حاول تختارين ناس متعاونين ولو طحتي بناس غير متعاونة ومتعبين تفاهمي معهم على طول ومن البداية لا تسكتين أبد أو تكلمي مع أستاذتكم .

عدم قبولك بالتخصص اللي تتمناه لا يحبطك حاولي تشدين حيلك وتغيرين التخصص .. وممكن تحبين وتلقين نفسك أكثر بالتخصص اللي انقبلتي فيه .

حفزي نفسك إذا حسيتي باحباط أو تكاسل، وأحب اشوف يوتيوب مقاطع تحفيزية تساعد وتشجع دائما .

الحرص على الصحة والمشي والأكل الجيد لأن الصحة بتأثر على الانتاجية والجهد .

وأنتم كيف استعدادكم للدوام ؟

وأخيرًا استمتعوا بأحلى سنوات 💖

 

في يوم طرأ سؤال ببالي وبدأت اتساءل ما هو الاستمتاع بالحياة وكيف نستمتع بها؟ وهل هناك طريقة للاستمتاع؟ وما هو الاختلاف لمفهوم الاستمتاع بين الناس؟!

واقصد بذلك جميع أنواع الاستمتاع وبأي شكلٍ كان، كل مرحلة في عمر الإنسان تختلف فيه المفاهيم والطرق المؤدية لذلك، الطفولة في اللعب والحركة والمراهقة بأحاديث الصديقات والدارج بينهم والنُضج والرشد بمعرفة أقرب وأسهل طريقة للاستمتاع .

 وهل اصبحنا نحكم بطريقة عيش الاخرين؟ هل نمطية الاستمتاع أصبحت أقوى من فكرة أن لكل شخص حياته ومتعته ؟ ولماذا وصلنا لهذه المرحلة؟ بل لماذا جعلناها أن تصل؟

سألت بعض الأصدقاء عن كيف يستمتعون بالحياة وكانت أجوبتهم:

نورة قالت التجاهل، تجاهل ما لا يعجبها من تصرفات وكلام وأنها لو أبدت اهتمام لكل حرف فسيمنعها من الاستمتاع بالحياة.

وقالت أبرار العبادة وعملها الخاص وأضافت بأن الحرية هي المتعة الكبرى!

وهناك من قالت النوم الجيد، كوب من مشروبها المفضل، عندما تأكل الرامن المفضل، البقاء وحيدة في الهدوء، القناعة، وأخرى قالت توافهه الأمور 😂.

وأحد الأجوبة التي أعجبتني جواب سارة صديقتي الجميلة ( عاشر السعيد تسعد ) ويا له من قول رائع وحقيقي! ولو فكرنا فيها لوجدناها مقنعة! فعندما تصاحب وتعاشر السعيد والمرتاح بحياته سيصلك شعوره وتتأثر بسعادته.

عن نفسي استمتع بعدة طرق أهمها الرضا، الرضا بما اعطاني الله والإيمان التام بما كُتب لي وتوكيل الله بأموري يزيد من الرضا الداخلي بان كل ما فعلته وسأفعله وسأراه بوقته  يَقُول الله عزّ وجلّ: (أنَا عِنْدَ ظَنِّ عَبْدِي بِي) .

ويا له من أمر صعب أن تبحث عن الرضا في حياة مليئة بالمظاهر وتوثيق لكل صغيرة وكبيرة! ومع برامج التواصل الاجتماعي صار من الصعب أن تصل وتقتنع بالرضا من الطبيعي أن نرغب بما تراه! والأصعب أن تربي وتزرع الرضا عند أطفالك.

وأيضا أحد طرقي للاستمتاع التأمل بالنعم المحاطة بي واستشعارها، ومن الصعب أن نجد وقت لتأمل ما حولك في زخم الحياة وسرعتها وكثافتها لكن أحاول أن اهدأ واتنفس واتأمل من حولي ما هي هذه النعم التي نسيناها ولم نعد نذكرها؟ بيت يأويني عائلة بجانبي صديقات كالأخوات طعام دافئ والكثير.

التعود على النعم يعمينا عن عظمتها ولا نشعر بقيمتها ودائمًا علينا أن نتذكر أن نشكر الله ونحمده على نعمه التي لا تُعد ولا تُحصى. 

 

وعلينا أن نتذكر دائمًا أن اختلاف الاستمتاع باختلاف الناس ولا أن نضع المتعة في إطار معين ونُلزم الاخرين باتباعه لأن الحياة والمتعة والسعادة مفتوحة للجميع كيف ما كانت.

دائمًا ما أتمنى بأن نخفف من حدة النمطية التي نراها وأن لا ننسى التفاصيل الصغيرة الممتعة وأن نتذكر بأن الحياة مرة واحدة.

وأنتم كيف تستمتعون بالحياة ؟

مرحبًا وويكند مريح ان شاءالله 😍!

رجعت مع فلمين ومسلسل رايقين وحلوين واستمتعت فيه شخصيًا 💕.

ما راح اطول عليكم ومتابعة ممتعة 🍿🍺.

 أفكار وهوس وهواجيس ما بعد التخرج ما تترك أحد !

مجرد جلوسك لفترة بدون الروتين اللي تعودنا عليه يخلق روتين ويوم غير منتظم والتغيرات المصاحبة للتغير هذا من نوم غير محدد وأحيانا اختلاف لنظام الحياة كاملة، غير كل اللي حولنا يتكلمون عن الوظائف والحث على أن لا تجلسين بالبيت بدون شيء 😩!

أنا مثل غيري من الخريجين اللي ما توظفوا وما تركت مكان وجهة إلا وقدمت عليها وغير أني اشوف صديقات وأقارب توظفوا وحصلوا على المكان اللي كانوا يبحثون عنه، أغلب اللي حولي يرسلون عروض وظائف وغير الكلام مثل "ليه ما تكملين دراسة أحسن من القعدة؟ أو ليه ما تسجلين بدورات" وغيره من الكلام هذا.

وبالتويتر والمشاهير وومنصات التحدث كلها تتكلم عن كيف تثبت نفسك في وظيفتك، كيف تثبت نفسك بعد التخرج، كيف تبدأ عملك الخاص !

لكن محد يتكلم عن كيف تقضي أيامك لو ما لقيت وظيفة أو ما تفكر تكمل دراستك ؟

ما زلت بالبيت ما توظفت والحمدلله تعديت مراحل الحزن والكآبة وشعور "ليه ما لقيت شيء؟"

بالبداية كنت متحمسة متى اتوظف وأدفع عجلة التنمية مع باقي الموظفين 😂 ارسلت السيرة الذاتية لكل مكان ورحت لكل مكان لكن ربي مو كاتب لي اتوظف الحين .

طبعًا الشهادة والتخصص لهم دور هل هي فعالة وسوق العمل يحتاجهم أو لا، ولطبيعة تخصصي كان وجود الخبرة مهم 🙆

زعلت وتحطمت لعدم وجود وظيفة بعدها توجهت للبحث عن أماكن للتطوع لكن ما كان كل مكان يحتاجون متطوعين، بعدها صرت أبحث عن دورات وايش ممكن يساعدني !

بعد كل هذه الخيبات بدأت افكر بعمق واخذت وقت طويل حتى اقتنعت وتيّقنت أن كل شيء مكتوب ومقدّر من ربي وأنه كاتب لي الخير والأنسب لي سواء وظيفة أو عمل خاص أو حتى ممكن ما اشتغل .

ارسل واقدم على أي وظيفة ابغاها وربي بيكتب الخير لي مهما كان ووين ما كان، أهم شيء ما أكون جالسة بمكاني واتحلطم ليه ما توظفت 😌!

بعد ما اقنعت نفسي بالفكرة هذي بدأت اجرب روتين يوم وحياة مختلف كل فترة حتى اكتشف أي وقت وروتين مريح ومحبب لقلبي 🌸.

جربت النوم بدري والقومة الفجر وكان ممتع ويومي يكون طويل لكن ما يصير المغرب إلا وأنا دايخة ادور النوم، بعدها جربت القومة 7-8 الصباح وكان أمتع روتين عشته !

وطبعًا مريت بحالة السهر والنوم الفجر وصاحبه الكثير من التعب والخمول وبكل مرة اوصل للمرحلة هذي اتدارك نفسي وانتبه لنومي .

أيضا من الأشياء اللي صرت اسويها ابحث عن قنوات باليوتيوب تحفزني وتلطّف اليوم واطلع بفايدة منها .

متابعة أفلام وثائقية، بحثت عن مدونات جديدة، تابعت أفلام ومسلسلات موجودة باللستة من زمان .

وأثناء كل هذي التجارب حصلت على فرصة تطوع في جمعية خيرية وكانت بمجال تخصصي واستمتعت جدًا لكن للأسف ما كانت تناسبني كوظيفة :(

بعدها حصلت على فرصة التطوع مع فريق "أترجم" في إدارة مواقع التواصل الاجتماعي لنشر المقاطع، كانت تجربة حلوة واكتشفت أني أحب النوع هذا من العمل وكتابة المحتوى، وكانت خلال الفترة هذي فكرة فتح مدونتي الخاصة تسبح في محيط أفكاري لكن ما قررت القرار النهائي نعم أو لا 😖.

-كتبت تدوينة عن أترجم باختصار-

بعد كل هذا رجعت لروتيني اليومي الفاضي لكن مليئ بالوقت اجرب وابحث أو حتى ما أسوي شيء .

-

خلال الثلاث سنوات هذي اكتشفت نفسي أكثر من أي فترة ثانية بحياتي !

سنواتي السابقة كانت مليئة بالملهيات دراسة واختبارات ووقت الاجازة وقت راحة مافيه وقت أفكر، لكن بعد التخرج كان عندي وقت كثير سألت نفسي أسئلة ما كانت بيوم تجي ببالي، تكلمت وناقشت ناس بكثير مواضيع وعلموني أشياء ما كنت اشوفها وأفكر فيها.

كانت سنوات رائعة وممتعة وشاكرة لها كثير، حقيقي بعد هالوقت أقدر أقول اكتشفت نفسي فعلًا وعرفتني أكثر.

وصرت أفكر ليه الناس ما تتكلم كيف تستغل وقت ما بعد التخرج باكتشاف ذاتك ؟

ما يحتاج نضغط على أنفسنا عشان ندرس أو نجمع شهادات أو نبدأ بزنس، صحيح شيء حلو الواحد يدعم نفسه بشهادات وأو حتى يبدأ عمله الخاص وينجح، لكن أيضا ما فيه عيب نكون أشخاص طبيعين نعيش بهدوء ونكتشف ذاتنا بأنفسنا 🌟.

اكتشاف الذات جميل وممتع تبدأ تعرف نفسك والأشياء اللي تفضلها وما تحبها وتكتشفت مبادئك وأفكارك، نقدر نستغل أوقات الفراغ بكل هدوء بمجرد تعرفك على نفسك .

أتمنى لكم وقت ممتع باكتشاف نفسكم والتعرف عليها من جديد 💗.

تسعدني تعليقاتكم ولو أعجبتك التدوينة أتمنى تشاركها مع من تحب، وتابعوني على برامج التواصل الاجتماعي 🤍.

هل بيوم كنتِ تشوفين ملابسك وتقولين ما عندي شيء ألبسه؟ كنتِ بمحل وشريتي شنطة واكتشفتِ أن عندك وحدة تشبه لها؟ وهل فكرتِ بيوم وش سبب كل هذا؟

بالبداية لازم نفكر بكمية الملابس الموجودة بدواليبنا، الأحذية الممتلئة بغرفنا، الكماليات والمؤنسات الغارقة بأدراجنا هل كلها نحتاجها فعلًا؟ هل كل شيء موجود عندنا نستخدمه؟

بزمن السرعة وبرامج التواصل الاجتماعي وكثرة المحلات والمتاجر الإلكترونية تتكاثر داخلنا رغبة الشراء والتجميع!

كنا نطلع للأسواق ونبحث ونشتري ونرجع للبيت بأكياس كبيرة، والحين نتسوق وحنا بالبيت من ملابس وأحذية ومنتجات تجميل وعناية جسم وبشرة والخيارات أكبر وأوسع! غير إعلانات التنزيلات والتخفيضات والعروض المختلفة خصوصا بالوقت هذا عروض نهاية السنة وقبلها "البلاك فرايدي" أصبحنا أشخاص استهلاكين كثير، أقدر استغل التخفيضات لكن باللي احتاجه!

وكثرة متابعة الناس بمواقع التواصل الاجتماعي ومؤثرين الأزياء وغيرهم ومتابعة جديدهم يخلق شعور الرغبة بالمثل وننسى حقيقة اختلاف وطبيعة العمل، عملهم يحتم عليهم هالشيء لكن هل واقعنا وحياتنا تحتم علينا كثرة الاستهلاك وتعبئة الدواليب؟

قبل ابدأ أفكر بالفكرة هذي ما كنت شخص استهلاكي كثير لكن بالغالب ما اطلع من السوق إلا ولازم أكون اشتريت شيء!

بعد كذا قرأت تدوينات وتابعت أفلام عن الاستهلاك والموضة السريعة والاقتصاد بعدها بدأت أفكر فعلا عندي ملابس وكماليات كثيرة ومليانة وأغلبها ما استخدمها ليه؟

-       أول خطوة سويتها سويت تجريد لكل أغراضي وطبعًا ما كان شيء سهل وبسيط وهنا تدوينة عن تجربتي بالتجريد.

-       ثاني شيء صرت اكتب قائمة بالأشياء اللي احتاجها بملاحظات الجوال أو بنوت صغير عندك باللي تبغين.

وكل ما طلعت اشوف القائمة واشتري اللي فيها، ولو بخاطري شيء اشوف ميزانيتي هل تسمح اشتري شيء واحد زيادة أو لا لكن ما احتاجه ولو كان معي شريت اللي بخاطري لكن شيء أو شيئين لا أكثر.

-       عند الشراء أحاول اشتري القطع العملية اللي اقدر استخدمها بكذا مكان وبأي طلعة .

-        وقت العروض والتخفيضات ما ادخل واشوف وأي إعلان اتخطاه بسرعة ولا اروح للأسواق إلا عشان اشتري اللي بقائمتي واطلع.

حتى القهوة اللي أكثر شيء الفلوس تروح عليها 😂 صرت اتحكم بنفسي أني ما اشتريها بكل طلعة أو بكل مرة اشتهيها.

مع الوقت لاحظت أني استخدم كل اللي عندي وإذا طلعت صرت ما اشتري أي شيء ادخل واطلع من المحلات عادي ما أحس برغبة الشراء!

 

الموضوع بسيط لكن يحتاج قوة إرادة، بس تحديد مبلغ للقهوة مثلًا وتحديد قائمة للحاجات قبل الكماليات بتساعد كثير بالتوفير وتقليل الاستهلاك.

-

تسعدني تعليقاتكم ولو أعجبتك التدوينة أتمنى تشاركها مع من تحب، وتابعوني على برامج التواصل الاجتماعي 🤍.

 

بالسنوات الأخيرة سمعنا الكلمة هذي كثير واختلفت الطرق والأفكار لكن النتيجة واحدة "التجريد".

تعرفت على الكلمة بمتابعة فيديوهات يوتيوب للناس يصورون غرفهم/مكاتبهم/بيوتهم ال"Minimalism" وبدأت بفهمها والقراءة عنها بعد ما جذبني نمط حياتهم وتعرفت على أنواع وأشكال كثيرة لها، وتابعت فلم وثائقي عن الMinimalism والموضة السريعة الفلم أتوقع موجود بنتفلكس .

بعدها طلعت ماري كوندو المرأة اليابانية بطريقة عملها وترتيبها للبيت واشتهرت كثير وأيضًا عملوا برنامج لها بنتفلكس تابعوه واستمتعوا بالانجاز اللي يحسون فيه 😂.

 

وبدأت تدخل الفكرة ببالي لأني بطبيعتي أكره التجميع والزحمة وبدأت فعلًا بالعملية وأبدا ما كانت سهلة وسريعة نتكلم عن تجميع سنين من ملابس وأحذية وشنط وقرطاسيات واكسسوارات وأشياء كثيرة !!

-طبعًا كل هذا من قراءاتي وتخطيطي وتجربتي الشخصية ما فيه مرجع أو قواعد أساسية 🌿-

بديت خطوة بخطوة واستمرت العملية شهور صراحة، وأول شيء حددت وين ابدأ وكيف ولوين ابغى أوصل .

خطواتي كانت:

-       أول شيء بدأت بملابسي.

طلعتها كلها وما خليت إلا اللي احتاجهم أي قطعة ما كنت البسها من فترة طويلة طلعتها على طول، والقطع اللي كنت احس مم يمكن احتاجها برضو طلعتها، وطبعا طلعتهم للجمعية.

ممكن تسوين إعادة تدوير لبعض القطع اللي عندك، أو إذا عندك قطع ما لبستيهم إلا مرة أو مرتين وأحيانا نلقى أشياء ما لبسناها أبدا نعطيها لأخواتنا/قرايبنا/صديقاتنا عاد أنتِ وناسك 🌸.

-       ثاني شيء الأحذية.

أي قطعة ما لبستها بالفترة الأخيرة على طول اطلعها بدون تفكير، ولو حسيت أني احتاج نوع معين اكتب اللي احتاجه على طول بقائمة المشتريات حقتي.

-       ثالث شيء الكماليات (ميك اب، اكسسوارات،...الخ)

نفس الفكرة كل شيء ما استخدمه طلعته واللي خربان رميته .

-       رابع شيء الكتب:

الكتب اللي قرأتها وما أحس تعلقت فيه كثير أني ممكن برجع اقرأهم طلعتهم، بعضها للكتاب المستعمل وبعضها حطيتهم بتطبيق كتابي تطبيق جميل ومساعد جدًا تقدرون تبيعون وتشترون الكتب فيه.

 

بعد ما خلصت حسيت دولابي يتنفس وأدراجي ارتب وعملية الترتيب اسهل بكثير، وصرت اعيد العملية هذي كل ثلاث أو خمس شهور، بتنصدمون بكمية الملابس اللي تتطلع بكل مرة 😳😂.

شعور الترتيب وأن كل شيء موجود عندك تستخدمينه وتعرفين مكانه وحاجته شعور مريح وما فيه تأنيب ضمير أبدًا، وتعبئة حياتنا بأشياء ما نحتاجها تخلق فينا مشاعر كثير ما نحتاجها وتخلينا ندخل بعلاقات ما نحتاجها، ممكن الموضوع ما له دخل لكن الاعتياد على فكرة التجميع بتتوسع وتنتقل لكل شيء بحياتك من الجمادات إلى الكائنات.

معرفة نفسك ومشاعرك واللي يريحها بتخليك تعيش حياة مجردة من الازدحام .

أتمنى لكم حياة خالية من الازدحام المزعج والراحة 💗.

-

تسعدني تعليقاتكم ولو أعجبتك التدوينة أتمنى تشاركها مع من تحب، وتابعوني على برامج التواصل الاجتماعي 🤍.

مرحباً 🌸

أنا من محبين اليوتيوب والمدونات .

وفي مرة كنت اقرأ بمدونة ملتحد شفتها تتكلم عن فريق ترجمة اسمه اُترجم 🌟

الفريق هذا يترجم المقاطع المفيدة القصيرة المليانة معلومات !!

اتابعهم بالتويتر و بالتيلقرام فيديواتهم حلوة ومعلومات تكون صغيرة أو روتينية لكن لها معنى أو تفسير هذا أكثر شيء حبيته

وأحلى شيء ترجمتهم تكون بنفس المقطع ما عندهم قناة يوتيوب مثلا لا يكون بنفس المقطع .

اختيارهم للفيديوات جميل وممتعة ممتعة ممتعة حتى تفتح عيونا على أشياء ما كنا شايفينها ولا متوقعينها .

بحط حساباتهم للي يبغى .

تويتر : https://twitter.com/autrjim

ووردبريس : https://autrjim.wordpress.com/

 

ما معنى البداية؟

من البدء، أول الشيء .

بداية العام الجديد، يوم ميلاد جديد، بداية حياة زوجية، أول يوم عمل/دراسية الكثير من البدايات والكثير من التطلعات 🍀.

والأغلب يكون في أوج الحماس والتخطيط لبدء العام الجديد من الصفر تجهيز قائمة الأهداف والأمنيات والتجارب والأعمال المرغوب تحقيقها خلال السنة الجديدة  .

لكن غالبًا ما نتوقف عند ثاني شهر وقد يحالفك وتصل لرابع/خامس شهر ويا له من انجاز جيد !

نخطط للكثير ونتناسى أهمية تحقيق الهدف، فإنهائك لهدف واحد أفضل من عدم انجازك لأي شيء في قائمتك أليس كذلك 😔؟

لذلك عند وضعك لقائمة أهدافك احرص على عدة أمور:

-       عدم تجديد أهدافك كل سنة !

احمل أهداف السنة الماضية معك وحاول تحقيقها لأنها ستكون كالحمل عليك وتهلك تفكيرك لأن رغبتك في تحقيقها ستشغلك، اجعل اهدافك نفسها حتى تحققها وجددها بحسب ظروفك وحياتك .

-       حدد نوع أهدافك .

بعيدة المدى، قريبة المدى، تحملها معك طوال السنة حتى إنجازها.

حدد ما تريد وما تريد إنجازه فمثلا إنقاص الوزن يختلف عن حصولك على ترقية !

حدد ما تريد وكيفية تحقيقه واسعى له .

-       امزج الهدف مع هواياتك ونشاطاتك .

عند المزج بين سعيك لتحقيقك هدفك وهواية أو نشاط تفعله سيزيد من رغبتك في الالتزام والاستمتاع ليس وكأنه واجب عليك إنجازه، بل أمر تطمح له وتتمنى أن تعيش خلاله حياة سعيدة ممتعة .

 

قد نتساهل الأمر بمجرد سماعك لكلام أحدهم أو قراءتك ولكن الأمر صعب بعض الشيء -لحد يلعب عليك-

تفكيرك وتخطيط خطوة مبشرة، البدء بالعمل والتنفيذ خطوة جيدة، تحقيقك لهدف واحد خطوة رائعة ومحفزة !

أنا بنفسي ما زلت أحاول وأجاهد في الالتزام لتحقيق ما أرغب به وأتمناه .

 

ولرفع الهمة والحماس أحب اقدم هذه الحلقة لبودكاست أبجورة " صفحات بيضاء "

أتمنى أن تستمتعوا 💗.

https://soundcloud.com/lubna-90/hd9qrvhdslp5