هل بيوم كنتِ تشوفين ملابسك وتقولين ما عندي شيء ألبسه؟ كنتِ بمحل وشريتي شنطة واكتشفتِ أن عندك وحدة تشبه لها؟ وهل فكرتِ بيوم وش سبب كل هذا؟

بالبداية لازم نفكر بكمية الملابس الموجودة بدواليبنا، الأحذية الممتلئة بغرفنا، الكماليات والمؤنسات الغارقة بأدراجنا هل كلها نحتاجها فعلًا؟ هل كل شيء موجود عندنا نستخدمه؟

بزمن السرعة وبرامج التواصل الاجتماعي وكثرة المحلات والمتاجر الإلكترونية تتكاثر داخلنا رغبة الشراء والتجميع!

كنا نطلع للأسواق ونبحث ونشتري ونرجع للبيت بأكياس كبيرة، والحين نتسوق وحنا بالبيت من ملابس وأحذية ومنتجات تجميل وعناية جسم وبشرة والخيارات أكبر وأوسع! غير إعلانات التنزيلات والتخفيضات والعروض المختلفة خصوصا بالوقت هذا عروض نهاية السنة وقبلها "البلاك فرايدي" أصبحنا أشخاص استهلاكين كثير، أقدر استغل التخفيضات لكن باللي احتاجه!

وكثرة متابعة الناس بمواقع التواصل الاجتماعي ومؤثرين الأزياء وغيرهم ومتابعة جديدهم يخلق شعور الرغبة بالمثل وننسى حقيقة اختلاف وطبيعة العمل، عملهم يحتم عليهم هالشيء لكن هل واقعنا وحياتنا تحتم علينا كثرة الاستهلاك وتعبئة الدواليب؟

قبل ابدأ أفكر بالفكرة هذي ما كنت شخص استهلاكي كثير لكن بالغالب ما اطلع من السوق إلا ولازم أكون اشتريت شيء!

بعد كذا قرأت تدوينات وتابعت أفلام عن الاستهلاك والموضة السريعة والاقتصاد بعدها بدأت أفكر فعلا عندي ملابس وكماليات كثيرة ومليانة وأغلبها ما استخدمها ليه؟

-       أول خطوة سويتها سويت تجريد لكل أغراضي وطبعًا ما كان شيء سهل وبسيط وهنا تدوينة عن تجربتي بالتجريد.

-       ثاني شيء صرت اكتب قائمة بالأشياء اللي احتاجها بملاحظات الجوال أو بنوت صغير عندك باللي تبغين.

وكل ما طلعت اشوف القائمة واشتري اللي فيها، ولو بخاطري شيء اشوف ميزانيتي هل تسمح اشتري شيء واحد زيادة أو لا لكن ما احتاجه ولو كان معي شريت اللي بخاطري لكن شيء أو شيئين لا أكثر.

-       عند الشراء أحاول اشتري القطع العملية اللي اقدر استخدمها بكذا مكان وبأي طلعة .

-        وقت العروض والتخفيضات ما ادخل واشوف وأي إعلان اتخطاه بسرعة ولا اروح للأسواق إلا عشان اشتري اللي بقائمتي واطلع.

حتى القهوة اللي أكثر شيء الفلوس تروح عليها 😂 صرت اتحكم بنفسي أني ما اشتريها بكل طلعة أو بكل مرة اشتهيها.

مع الوقت لاحظت أني استخدم كل اللي عندي وإذا طلعت صرت ما اشتري أي شيء ادخل واطلع من المحلات عادي ما أحس برغبة الشراء!

 

الموضوع بسيط لكن يحتاج قوة إرادة، بس تحديد مبلغ للقهوة مثلًا وتحديد قائمة للحاجات قبل الكماليات بتساعد كثير بالتوفير وتقليل الاستهلاك.

-

تسعدني تعليقاتكم ولو أعجبتك التدوينة أتمنى تشاركها مع من تحب، وتابعوني على برامج التواصل الاجتماعي 🤍.