مرحبًا 🌿.

في يوم من الأيام وأنا اتصفح الانستقرام لقيت منشور لمنصة هاو إعلان عن تجربة لفن القطّ العسيري .

أولًا خلونا نتعرف على هذا الفن !

هو فن من الفنون النسائية التقليدية لزخرفة الجدران الداخلية للمنازل .

وبعد أن كان هذا الفن يمارس حصراً من قبل النساء، فقد أصبح اليوم يمارس من قبل الفنانين والمصممين والمهندسين من الرجال والنساء، وتجدر الإشارة إلى أنّ هذا الأسلوب الفنّي يعزّز الترابط الاجتماعي والتضامن بين النساء في المجتمع !

ويتميز باستخدامهم للألوان الطبيعية المستوحاة من حولهم، فمثلَا اللون الأخضر يستخرجونه من البرسيم والأسود وغيره .

وتم إدراج هذا الفن ضمن القائمة التمثيلية للتراث العالمي غير المادي في اليونسكو منذ عام 2017 .

-

وفي الثالث والعشرين من يناير كان اليوم المنتظر 🤩!

كان المكان مهيأ ومشجع للتجربة الطاولة المستطيلة وما عليها من ألوان وفُرش التلوين وأوراق الرسومات .

وعلى اليمين طاولة وعليها اللوحة التفاعلية للمشتركات .

بدأت المحترفة الاء مغاوي تتكلم لنا عن أصل الفن وكيف بدأ واستعرضت بعض الجداريات الموجودة في البيوت في عسير، وتعرفنا على الألوان المستخدمة ومن وين يتم استخراجها، وعرفتنا على بعض الفنانات المشهورات .

بعدها بدأنا بالتطبيق وكان المكان مجهز بالأوراق المرسوم عليها الأشكال للتلوين وأوراق للرسم من البداية لو المتدربة حبت تجرب !

التلوين من الأمور الممتعة بالنسبة لي وكانت هذي التجربة فرصة لتجديد هذا الشعور .

ومن الأمور اللطيفة من المحترفة حضّرت القهوة العربية واللقيمات وقدمته في صحن من أعمال والدتها 💗!

من جلست وهو يلفتني شكله وألوانه ملفتة بشكل مبهر وجميل ✨.

وفي الأخير طلبت منا التلوين في اللوحة التفاعلية باستخدام الألوان الطبيعية .

كان يوم ممتع وشاكرة كل الشكر لمنصة هاو على إتاحة هذه الفرصة لي .

-

منصة هاو فيها الكثير من التجارب المختلفة في الفن والطبخ والرحلات الميدانية .

هذا رابط المنصة لمن يريد أن يعيش ويجرب !

 https://www.haosaudi.com/

وهذا رابط لمتجر عائلة الاستاذة الاء مغاوي 

https://instagram.com/qatt_art?igshid=u41e0yhd5j4m 

-أتمنى لكم تجارب ممتعة 🌊-

تسعدني تعليقاتكم ولو أعجبتك التدوينة أتمنى تشاركها مع من تحب، وتابعوني على برامج التواصل الاجتماعي 🤍.

 أفكار وهوس وهواجيس ما بعد التخرج ما تترك أحد !

مجرد جلوسك لفترة بدون الروتين اللي تعودنا عليه يخلق روتين ويوم غير منتظم والتغيرات المصاحبة للتغير هذا من نوم غير محدد وأحيانا اختلاف لنظام الحياة كاملة، غير كل اللي حولنا يتكلمون عن الوظائف والحث على أن لا تجلسين بالبيت بدون شيء 😩!

أنا مثل غيري من الخريجين اللي ما توظفوا وما تركت مكان وجهة إلا وقدمت عليها وغير أني اشوف صديقات وأقارب توظفوا وحصلوا على المكان اللي كانوا يبحثون عنه، أغلب اللي حولي يرسلون عروض وظائف وغير الكلام مثل "ليه ما تكملين دراسة أحسن من القعدة؟ أو ليه ما تسجلين بدورات" وغيره من الكلام هذا.

وبالتويتر والمشاهير وومنصات التحدث كلها تتكلم عن كيف تثبت نفسك في وظيفتك، كيف تثبت نفسك بعد التخرج، كيف تبدأ عملك الخاص !

لكن محد يتكلم عن كيف تقضي أيامك لو ما لقيت وظيفة أو ما تفكر تكمل دراستك ؟

ما زلت بالبيت ما توظفت والحمدلله تعديت مراحل الحزن والكآبة وشعور "ليه ما لقيت شيء؟"

بالبداية كنت متحمسة متى اتوظف وأدفع عجلة التنمية مع باقي الموظفين 😂 ارسلت السيرة الذاتية لكل مكان ورحت لكل مكان لكن ربي مو كاتب لي اتوظف الحين .

طبعًا الشهادة والتخصص لهم دور هل هي فعالة وسوق العمل يحتاجهم أو لا، ولطبيعة تخصصي كان وجود الخبرة مهم 🙆

زعلت وتحطمت لعدم وجود وظيفة بعدها توجهت للبحث عن أماكن للتطوع لكن ما كان كل مكان يحتاجون متطوعين، بعدها صرت أبحث عن دورات وايش ممكن يساعدني !

بعد كل هذه الخيبات بدأت افكر بعمق واخذت وقت طويل حتى اقتنعت وتيّقنت أن كل شيء مكتوب ومقدّر من ربي وأنه كاتب لي الخير والأنسب لي سواء وظيفة أو عمل خاص أو حتى ممكن ما اشتغل .

ارسل واقدم على أي وظيفة ابغاها وربي بيكتب الخير لي مهما كان ووين ما كان، أهم شيء ما أكون جالسة بمكاني واتحلطم ليه ما توظفت 😌!

بعد ما اقنعت نفسي بالفكرة هذي بدأت اجرب روتين يوم وحياة مختلف كل فترة حتى اكتشف أي وقت وروتين مريح ومحبب لقلبي 🌸.

جربت النوم بدري والقومة الفجر وكان ممتع ويومي يكون طويل لكن ما يصير المغرب إلا وأنا دايخة ادور النوم، بعدها جربت القومة 7-8 الصباح وكان أمتع روتين عشته !

وطبعًا مريت بحالة السهر والنوم الفجر وصاحبه الكثير من التعب والخمول وبكل مرة اوصل للمرحلة هذي اتدارك نفسي وانتبه لنومي .

أيضا من الأشياء اللي صرت اسويها ابحث عن قنوات باليوتيوب تحفزني وتلطّف اليوم واطلع بفايدة منها .

متابعة أفلام وثائقية، بحثت عن مدونات جديدة، تابعت أفلام ومسلسلات موجودة باللستة من زمان .

وأثناء كل هذي التجارب حصلت على فرصة تطوع في جمعية خيرية وكانت بمجال تخصصي واستمتعت جدًا لكن للأسف ما كانت تناسبني كوظيفة :(

بعدها حصلت على فرصة التطوع مع فريق "أترجم" في إدارة مواقع التواصل الاجتماعي لنشر المقاطع، كانت تجربة حلوة واكتشفت أني أحب النوع هذا من العمل وكتابة المحتوى، وكانت خلال الفترة هذي فكرة فتح مدونتي الخاصة تسبح في محيط أفكاري لكن ما قررت القرار النهائي نعم أو لا 😖.

-كتبت تدوينة عن أترجم باختصار-

بعد كل هذا رجعت لروتيني اليومي الفاضي لكن مليئ بالوقت اجرب وابحث أو حتى ما أسوي شيء .

-

خلال الثلاث سنوات هذي اكتشفت نفسي أكثر من أي فترة ثانية بحياتي !

سنواتي السابقة كانت مليئة بالملهيات دراسة واختبارات ووقت الاجازة وقت راحة مافيه وقت أفكر، لكن بعد التخرج كان عندي وقت كثير سألت نفسي أسئلة ما كانت بيوم تجي ببالي، تكلمت وناقشت ناس بكثير مواضيع وعلموني أشياء ما كنت اشوفها وأفكر فيها.

كانت سنوات رائعة وممتعة وشاكرة لها كثير، حقيقي بعد هالوقت أقدر أقول اكتشفت نفسي فعلًا وعرفتني أكثر.

وصرت أفكر ليه الناس ما تتكلم كيف تستغل وقت ما بعد التخرج باكتشاف ذاتك ؟

ما يحتاج نضغط على أنفسنا عشان ندرس أو نجمع شهادات أو نبدأ بزنس، صحيح شيء حلو الواحد يدعم نفسه بشهادات وأو حتى يبدأ عمله الخاص وينجح، لكن أيضا ما فيه عيب نكون أشخاص طبيعين نعيش بهدوء ونكتشف ذاتنا بأنفسنا 🌟.

اكتشاف الذات جميل وممتع تبدأ تعرف نفسك والأشياء اللي تفضلها وما تحبها وتكتشفت مبادئك وأفكارك، نقدر نستغل أوقات الفراغ بكل هدوء بمجرد تعرفك على نفسك .

أتمنى لكم وقت ممتع باكتشاف نفسكم والتعرف عليها من جديد 💗.

تسعدني تعليقاتكم ولو أعجبتك التدوينة أتمنى تشاركها مع من تحب، وتابعوني على برامج التواصل الاجتماعي 🤍.

هل بيوم كنتِ تشوفين ملابسك وتقولين ما عندي شيء ألبسه؟ كنتِ بمحل وشريتي شنطة واكتشفتِ أن عندك وحدة تشبه لها؟ وهل فكرتِ بيوم وش سبب كل هذا؟

بالبداية لازم نفكر بكمية الملابس الموجودة بدواليبنا، الأحذية الممتلئة بغرفنا، الكماليات والمؤنسات الغارقة بأدراجنا هل كلها نحتاجها فعلًا؟ هل كل شيء موجود عندنا نستخدمه؟

بزمن السرعة وبرامج التواصل الاجتماعي وكثرة المحلات والمتاجر الإلكترونية تتكاثر داخلنا رغبة الشراء والتجميع!

كنا نطلع للأسواق ونبحث ونشتري ونرجع للبيت بأكياس كبيرة، والحين نتسوق وحنا بالبيت من ملابس وأحذية ومنتجات تجميل وعناية جسم وبشرة والخيارات أكبر وأوسع! غير إعلانات التنزيلات والتخفيضات والعروض المختلفة خصوصا بالوقت هذا عروض نهاية السنة وقبلها "البلاك فرايدي" أصبحنا أشخاص استهلاكين كثير، أقدر استغل التخفيضات لكن باللي احتاجه!

وكثرة متابعة الناس بمواقع التواصل الاجتماعي ومؤثرين الأزياء وغيرهم ومتابعة جديدهم يخلق شعور الرغبة بالمثل وننسى حقيقة اختلاف وطبيعة العمل، عملهم يحتم عليهم هالشيء لكن هل واقعنا وحياتنا تحتم علينا كثرة الاستهلاك وتعبئة الدواليب؟

قبل ابدأ أفكر بالفكرة هذي ما كنت شخص استهلاكي كثير لكن بالغالب ما اطلع من السوق إلا ولازم أكون اشتريت شيء!

بعد كذا قرأت تدوينات وتابعت أفلام عن الاستهلاك والموضة السريعة والاقتصاد بعدها بدأت أفكر فعلا عندي ملابس وكماليات كثيرة ومليانة وأغلبها ما استخدمها ليه؟

-       أول خطوة سويتها سويت تجريد لكل أغراضي وطبعًا ما كان شيء سهل وبسيط وهنا تدوينة عن تجربتي بالتجريد.

-       ثاني شيء صرت اكتب قائمة بالأشياء اللي احتاجها بملاحظات الجوال أو بنوت صغير عندك باللي تبغين.

وكل ما طلعت اشوف القائمة واشتري اللي فيها، ولو بخاطري شيء اشوف ميزانيتي هل تسمح اشتري شيء واحد زيادة أو لا لكن ما احتاجه ولو كان معي شريت اللي بخاطري لكن شيء أو شيئين لا أكثر.

-       عند الشراء أحاول اشتري القطع العملية اللي اقدر استخدمها بكذا مكان وبأي طلعة .

-        وقت العروض والتخفيضات ما ادخل واشوف وأي إعلان اتخطاه بسرعة ولا اروح للأسواق إلا عشان اشتري اللي بقائمتي واطلع.

حتى القهوة اللي أكثر شيء الفلوس تروح عليها 😂 صرت اتحكم بنفسي أني ما اشتريها بكل طلعة أو بكل مرة اشتهيها.

مع الوقت لاحظت أني استخدم كل اللي عندي وإذا طلعت صرت ما اشتري أي شيء ادخل واطلع من المحلات عادي ما أحس برغبة الشراء!

 

الموضوع بسيط لكن يحتاج قوة إرادة، بس تحديد مبلغ للقهوة مثلًا وتحديد قائمة للحاجات قبل الكماليات بتساعد كثير بالتوفير وتقليل الاستهلاك.

-

تسعدني تعليقاتكم ولو أعجبتك التدوينة أتمنى تشاركها مع من تحب، وتابعوني على برامج التواصل الاجتماعي 🤍.

 

بالسنوات الأخيرة سمعنا الكلمة هذي كثير واختلفت الطرق والأفكار لكن النتيجة واحدة "التجريد".

تعرفت على الكلمة بمتابعة فيديوهات يوتيوب للناس يصورون غرفهم/مكاتبهم/بيوتهم ال"Minimalism" وبدأت بفهمها والقراءة عنها بعد ما جذبني نمط حياتهم وتعرفت على أنواع وأشكال كثيرة لها، وتابعت فلم وثائقي عن الMinimalism والموضة السريعة الفلم أتوقع موجود بنتفلكس .

بعدها طلعت ماري كوندو المرأة اليابانية بطريقة عملها وترتيبها للبيت واشتهرت كثير وأيضًا عملوا برنامج لها بنتفلكس تابعوه واستمتعوا بالانجاز اللي يحسون فيه 😂.

 

وبدأت تدخل الفكرة ببالي لأني بطبيعتي أكره التجميع والزحمة وبدأت فعلًا بالعملية وأبدا ما كانت سهلة وسريعة نتكلم عن تجميع سنين من ملابس وأحذية وشنط وقرطاسيات واكسسوارات وأشياء كثيرة !!

-طبعًا كل هذا من قراءاتي وتخطيطي وتجربتي الشخصية ما فيه مرجع أو قواعد أساسية 🌿-

بديت خطوة بخطوة واستمرت العملية شهور صراحة، وأول شيء حددت وين ابدأ وكيف ولوين ابغى أوصل .

خطواتي كانت:

-       أول شيء بدأت بملابسي.

طلعتها كلها وما خليت إلا اللي احتاجهم أي قطعة ما كنت البسها من فترة طويلة طلعتها على طول، والقطع اللي كنت احس مم يمكن احتاجها برضو طلعتها، وطبعا طلعتهم للجمعية.

ممكن تسوين إعادة تدوير لبعض القطع اللي عندك، أو إذا عندك قطع ما لبستيهم إلا مرة أو مرتين وأحيانا نلقى أشياء ما لبسناها أبدا نعطيها لأخواتنا/قرايبنا/صديقاتنا عاد أنتِ وناسك 🌸.

-       ثاني شيء الأحذية.

أي قطعة ما لبستها بالفترة الأخيرة على طول اطلعها بدون تفكير، ولو حسيت أني احتاج نوع معين اكتب اللي احتاجه على طول بقائمة المشتريات حقتي.

-       ثالث شيء الكماليات (ميك اب، اكسسوارات،...الخ)

نفس الفكرة كل شيء ما استخدمه طلعته واللي خربان رميته .

-       رابع شيء الكتب:

الكتب اللي قرأتها وما أحس تعلقت فيه كثير أني ممكن برجع اقرأهم طلعتهم، بعضها للكتاب المستعمل وبعضها حطيتهم بتطبيق كتابي تطبيق جميل ومساعد جدًا تقدرون تبيعون وتشترون الكتب فيه.

 

بعد ما خلصت حسيت دولابي يتنفس وأدراجي ارتب وعملية الترتيب اسهل بكثير، وصرت اعيد العملية هذي كل ثلاث أو خمس شهور، بتنصدمون بكمية الملابس اللي تتطلع بكل مرة 😳😂.

شعور الترتيب وأن كل شيء موجود عندك تستخدمينه وتعرفين مكانه وحاجته شعور مريح وما فيه تأنيب ضمير أبدًا، وتعبئة حياتنا بأشياء ما نحتاجها تخلق فينا مشاعر كثير ما نحتاجها وتخلينا ندخل بعلاقات ما نحتاجها، ممكن الموضوع ما له دخل لكن الاعتياد على فكرة التجميع بتتوسع وتنتقل لكل شيء بحياتك من الجمادات إلى الكائنات.

معرفة نفسك ومشاعرك واللي يريحها بتخليك تعيش حياة مجردة من الازدحام .

أتمنى لكم حياة خالية من الازدحام المزعج والراحة 💗.

-

تسعدني تعليقاتكم ولو أعجبتك التدوينة أتمنى تشاركها مع من تحب، وتابعوني على برامج التواصل الاجتماعي 🤍.