بالسنوات الأخيرة سمعنا الكلمة هذي كثير واختلفت الطرق والأفكار لكن النتيجة واحدة "التجريد".

تعرفت على الكلمة بمتابعة فيديوهات يوتيوب للناس يصورون غرفهم/مكاتبهم/بيوتهم ال"Minimalism" وبدأت بفهمها والقراءة عنها بعد ما جذبني نمط حياتهم وتعرفت على أنواع وأشكال كثيرة لها، وتابعت فلم وثائقي عن الMinimalism والموضة السريعة الفلم أتوقع موجود بنتفلكس .

بعدها طلعت ماري كوندو المرأة اليابانية بطريقة عملها وترتيبها للبيت واشتهرت كثير وأيضًا عملوا برنامج لها بنتفلكس تابعوه واستمتعوا بالانجاز اللي يحسون فيه 😂.

 

وبدأت تدخل الفكرة ببالي لأني بطبيعتي أكره التجميع والزحمة وبدأت فعلًا بالعملية وأبدا ما كانت سهلة وسريعة نتكلم عن تجميع سنين من ملابس وأحذية وشنط وقرطاسيات واكسسوارات وأشياء كثيرة !!

-طبعًا كل هذا من قراءاتي وتخطيطي وتجربتي الشخصية ما فيه مرجع أو قواعد أساسية 🌿-

بديت خطوة بخطوة واستمرت العملية شهور صراحة، وأول شيء حددت وين ابدأ وكيف ولوين ابغى أوصل .

خطواتي كانت:

-       أول شيء بدأت بملابسي.

طلعتها كلها وما خليت إلا اللي احتاجهم أي قطعة ما كنت البسها من فترة طويلة طلعتها على طول، والقطع اللي كنت احس مم يمكن احتاجها برضو طلعتها، وطبعا طلعتهم للجمعية.

ممكن تسوين إعادة تدوير لبعض القطع اللي عندك، أو إذا عندك قطع ما لبستيهم إلا مرة أو مرتين وأحيانا نلقى أشياء ما لبسناها أبدا نعطيها لأخواتنا/قرايبنا/صديقاتنا عاد أنتِ وناسك 🌸.

-       ثاني شيء الأحذية.

أي قطعة ما لبستها بالفترة الأخيرة على طول اطلعها بدون تفكير، ولو حسيت أني احتاج نوع معين اكتب اللي احتاجه على طول بقائمة المشتريات حقتي.

-       ثالث شيء الكماليات (ميك اب، اكسسوارات،...الخ)

نفس الفكرة كل شيء ما استخدمه طلعته واللي خربان رميته .

-       رابع شيء الكتب:

الكتب اللي قرأتها وما أحس تعلقت فيه كثير أني ممكن برجع اقرأهم طلعتهم، بعضها للكتاب المستعمل وبعضها حطيتهم بتطبيق كتابي تطبيق جميل ومساعد جدًا تقدرون تبيعون وتشترون الكتب فيه.

 

بعد ما خلصت حسيت دولابي يتنفس وأدراجي ارتب وعملية الترتيب اسهل بكثير، وصرت اعيد العملية هذي كل ثلاث أو خمس شهور، بتنصدمون بكمية الملابس اللي تتطلع بكل مرة 😳😂.

شعور الترتيب وأن كل شيء موجود عندك تستخدمينه وتعرفين مكانه وحاجته شعور مريح وما فيه تأنيب ضمير أبدًا، وتعبئة حياتنا بأشياء ما نحتاجها تخلق فينا مشاعر كثير ما نحتاجها وتخلينا ندخل بعلاقات ما نحتاجها، ممكن الموضوع ما له دخل لكن الاعتياد على فكرة التجميع بتتوسع وتنتقل لكل شيء بحياتك من الجمادات إلى الكائنات.

معرفة نفسك ومشاعرك واللي يريحها بتخليك تعيش حياة مجردة من الازدحام .

أتمنى لكم حياة خالية من الازدحام المزعج والراحة 💗.

-

تسعدني تعليقاتكم ولو أعجبتك التدوينة أتمنى تشاركها مع من تحب، وتابعوني على برامج التواصل الاجتماعي 🤍.