مرحبًا بعد انقطاع 🌼.
حبيت تكون رجعتي بكتابة هذه التدوينة مع بداية الدراسة والدوامات تأخرت شوي لكن لا بأس 👀.
صراحة احترت كيف ابدأ ومن وين لكن نبدأ بالاستعداد النفسي :
- أولًا التفكير بقناعة بأن الدراسة لا مفر منها بما أنك اخترت تدرس فأكيد فيه هدف تطمح له🙇، فنحاول تغيير فكرة الدوام مثلًا نصحى أبكرمن العادة لو بربع ساعة للاستعداد النفسي والمزاجي .
- ثانيًا محاولة تنظيم النوم قبل بداية الدوامات وهذي نقطة مهمة جدًا لأن النوم يأثر بشكل كبير على الانتاجية والمزاج، حتى جسديا السهر والنوم الغير كافي منهك .
- ثالثًا تحديد الأهداف المرغوب تحقيقها خلال الترم/السنة، إذا كان الهدف معروف وواضح يسهل الطريق لتحقيقه .
⚛ الاستعداد الشخصي :
احرصي على اللبس المريح والحذاء المريح خصوصا اذا الدوام طويل فالراحه بتكون أهم شيء عندك .
شنطة الدوام الأفضل تكون وحده مناسب حجدمها لحاجتك اليومية ومريحة .
الحاجات الضرورية اللي تكون بالشنطة، من تجربة واطلاع على أفكار ثانية:
- دفتر جيب لكتابة الملاحظات والأشياء الضرورية والجانبية ( طبعا غير دفتر المحاضرات والكتب ) بحيث هالدفتر يكون موجود بالشنطه ما يطلع ولا ياخذه أحد .
- مقلمة أقلام حبر ورصاص .
- محفظة لبطاقات الهوية والفلوس الكاش .
- شنطة تجميلية صغيرة ( مرطب شفايف، روج، ماسكرا، قلم حواجب ) هذي الشنطة يُفضل تكون جاهزه دائما حتى بأي طلعه تاخذينها.
- شنطة العناية الشخصية ( خيط أسنان، فرشاة اسنان صغيرة، حلاوة نعناع، لصقات جروح، بنادول، مقص أظافر، مسحات طبية، فوط صحية يومية ) بتشكروني على هذي الشنطة لأن مو كثير ممكن يفكر بهالنقطه لكن بتحتاجينهها خصوصا لو الدوام طويل .
- فرشاة شعر صغيرة، ربطات شعر/clips .
- دراي شامبو .
- عطر، بخاخ مزيل عرق .
- كريم يد .
- شنطة قماشية صغيرة للأكسسوارات تكون لأكثر اكسسوارات مناسبة مع أي شيء بحيث لو نسيتي تلبسين عندك احتياط .
- مناديل مبللة ومناديل جيب .
- باور بانك .
 |
| صورة توضيحية لشنطتي سابقا |
⚛ الحياة الجامعية :
دايم اقولها لكل مستجد استمتع الجامعة جميلة وممتعة لكن عيشوها صح.
مرة فيه شخص قال عن كلام الدكتور بجامعتهم "أنت بداية الترم تملك 100 درجة لكل مادة وخلال الدراسة واجتهادك تحافظ عليها أنا اخذ الدرجات اللي تتنازل عنها" اتوقع هذا الكلام بيغير نظرتك للدرجات وتحافظين عليها.
طيب نجي لأول شيء اختاري الأصدقاء الصح اللي يكونون عون لك ما يأخرونك ولا يوقفون بطريقك وهالشيء بتقدرين عليه إذا تمهلتي بالاختيار لا تستعجلين أبد عشان ما تندمين !
إذا انطلب منكم عمل جماعي باختياركم حاول تختارين ناس متعاونين ولو طحتي بناس غير متعاونة ومتعبين تفاهمي معهم على طول ومن البداية لا تسكتين أبد أو تكلمي مع أستاذتكم .
عدم قبولك بالتخصص اللي تتمناه لا يحبطك حاولي تشدين حيلك وتغيرين التخصص .. وممكن تحبين وتلقين نفسك أكثر بالتخصص اللي انقبلتي فيه .
حفزي نفسك إذا حسيتي باحباط أو تكاسل، وأحب اشوف يوتيوب مقاطع تحفيزية تساعد وتشجع دائما .
الحرص على الصحة والمشي والأكل الجيد لأن الصحة بتأثر على الانتاجية والجهد .
وأنتم كيف استعدادكم للدوام ؟
وأخيرًا استمتعوا بأحلى سنوات 💖
